Në kuadër të nismës “Sunny Schools”, Lëvizja Rinore Egjiptiane dhe Rome (LRER) ka zbatuar projektin “Green Generation 3.0 – Shkollat e Angazhuara për Veprime Klimatike”, në partneritet me Open Society Foundations Western Balkans.
Projekti u shtri në disa bashki të vendit, përfshirë Shkodrën, Elbasanin dhe Tiranën, me synim promovimin e energjisë së rinovueshme, rritjen e ndërgjegjësimit për ndryshimet klimatike dhe fuqizimin e komuniteteve shkollore. Në total, panele fotovoltaike u instaluan në 15 shkolla: 7 në Bashkinë Shkodër, 6 në Bashkinë Elbasan dhe 2 në Bashkinë Tiranë. Instalimi i tyre ka kontribuar në uljen e kostove të energjisë elektrike dhe në krijimin e mundësive për riinvestimin e kursimeve në përmirësimin e kushteve në shkolla. Një nga rezultatet konkrete u arrit në shkollën “Ptoleme Xhuvani” në Elbasan, ku, falë kursimeve nga energjia diellore dhe mbështetjes së bashkisë, u realizua rikonstruksioni i tualeteve dhe oborrit të shkollës.
Paralelisht, LRER zhvilloi aktivitete ndërgjegjësuese dhe trajnuese me nxënës, mësues dhe prindër. Në 15 shkollat përfituese u organizuan trajnime dhe workshope mbi ndryshimet klimatike, energjinë e gjelbër dhe përdorimin e burimeve të rinovueshme, duke rritur njohuritë dhe kapacitetet për veprim konkret në mbrojtje të mjedisit.
Projekti përfshiu gjithashtu trajnime për advokim, menaxhim projektesh dhe mbledhje fondesh, me synim fuqizimin e komuniteteve shkollore për të siguruar investime të qëndrueshme në të ardhmen. Nxënësit u angazhuan edhe në aktivitete kreative, përfshirë krijimin e videove ndërgjegjësuese dhe gara për promovimin e ideve mjedisore.
Një komponent i rëndësishëm ishte organizimi i takimeve informuese dhe forumeve komunitare, ku u diskutuan sfidat mjedisore dhe mënyrat për t’i adresuar ato. Gjithashtu, u analizuan të dhënat mbi konsumin dhe kursimet e energjisë, duke rritur transparencën dhe menaxhimin e përfitimeve.
Përmes “Green Generation 3.0”, janë ndërtuar bashkëpunime të qëndrueshme me drejtues shkollash, institucione lokale dhe komunitete, duke forcuar rolin e shkollave si qendra të veprimit klimatik dhe zhvillimit të qëndrueshëm. 🌍☀️♻️
