21 nga 60 përfitues u integruan në tregun e punës, si rezultat i projektit “Rritja e Kapaciteteve të Punëkërkuesve Romë dhe Egjiptianë për t’u Përfshirë në Tregun e Punës”, i zbatuar nga LRER me mbështetjen e UNDP.
Projekti u fokusua në krijimin e mundësive të barabarta për punëkërkuesit nga komunitetet rome dhe egjiptiane, duke ofruar një qasje të personalizuar që kombinoi këshillimin, orientimin dhe zhvillimin e aftësive për punësim. Në fillim, 60 përfitues u përfshinë në trajnime dhe u mbështetën përmes takimeve individuale dhe planeve të personalizuara të riintegrimit dhe punësimit. Ky proces synoi të adresonte nevojat konkrete të secilit dhe të ndërtonte aftësitë e nevojshme për përballjen me tregun e punës.
Rezultatet treguan një ndikim të qartë: 21 pjesëmarrës arritën të sigurojnë punësim, duke shënuar një hap të rëndësishëm drejt stabilitetit ekonomik dhe përfshirjes sociale.
Përtej punësimit, të gjithë përfituesit zhvilluan aftësi të rëndësishme profesionale dhe sociale. Ata përmirësuan komunikimin me punëdhënësit, prezantimin profesional, vetëbesimin dhe aftësitë për rrjetëzim — elementë kyç për integrim të qëndrueshëm në tregun e punës.
Një tjetër rezultat konkret ishte përfshirja e 6 përfituesve në kurse profesionale pranë Qendrës së Formimit Profesional, duke rritur mundësitë e tyre për zhvillim të mëtejshëm.Për të afruar pjesëmarrësit me realitetin e punës, projekti përfshiu edhe vizita në biznese dhe simulime intervistash pune. Këto aktivitete i ndihmuan ata të kuptonin më mirë kërkesat e tregut dhe të fitonin më shumë siguri në proceset e aplikimit.
Gjatë gjithë zbatimit, u vu re një rritje e dukshme e vetëbesimit dhe motivimit tek pjesëmarrësit, duke treguar se ndikimi i projektit shkoi përtej punësimit dhe preku edhe aspektin personal dhe social. Përmes kësaj ndërhyrjeje, LRER kontribuoi në krijimin e mundësive reale për përfshirje dhe zhvillim, duke dëshmuar se mbështetja e personalizuar mund të sjellë rezultate konkrete dhe të qëndrueshme.
